បន្ទាប់ពីទទួលបានការអនុញ្ញាតពីឯកឧត្តមបណ្ឌិតសភាចារ្យប្រធានរាជបណ្ឌិត្យសភាកម្ពុជា នៅថ្ងៃទី៦ដល់ទី១០ ខែកុម្ភៈ ឆ្នាំ២០២០ លោកបណ្ឌិត ផុន កសិកា ប្រធានស្តីទីវិទ្យាស្ថានមនុស្សសាស្ត្រនិងវិទ្យាសាស្ត្រសង្គម បានចុះសិក្សាស្រាវជ្រាវអំពីប្រវត្តិសាស្ត្រនិងបុរាណវត្ថុវិទ្យានៅតំបន់ស្រីសន្ធរ (អតីតរាជធានីខ្មែរសម័យកណ្ដាល) ខេត្តកំពង់ចាមនិងតំបន់ព្រះប្រសប់ ខេត្តកណ្ដាល។ ការសិក្សាស្រាវជ្រាវនេះមានកិច្ចសហការណ៍រវាងស្ថាប័នជាតិ ដែលមានវិទ្យាស្ថានវប្បធម៌និងវិចិត្រិសិល្បៈនៃរាជបណ្ឌិត្យសភាកម្ពុជា គឹកញ្ញា តាកេត ស័កដា ជាតំណាង, ក្រសួងវប្បធម៌និងវិចិត្រសិល្បៈ ដែលមានលោក ឡេង វិទូ និង លោក ហ៊ាង មេសា ជាតំណាង, តំណាងអាជ្ញាធរជំនាញនៅមូលដ្ឋាន ព្រមទាំងអ្នកជំនាញអន្ដរជាតិមកពីវិទ្យាស្ថានជាតិណារ៉ា ប្រទេសជប៉ុន (Nara National Research Institute for Cultural Properties) និងមកពីសាកលវិទ្យាល័យវ្លីនឌ័រ ប្រទេសអូស្ត្រាលី (UNIVERSITY OF FLINDERS)។ នេះជាឱកាសមួយដែលអ្នកស្រាវជ្រាវប្រវត្តិសាស្ត្រនិងបុរាណវត្ថុវិទ្យាខ្មែរទទួលបានព័ត៌មាន ក៏ដូចជាទិន្នន័យប្រវត្តិសាស្ត្រ ព្រមទាំងបានបង្កើនចំណេះជំនាញក្នុងវិស័យស្រាវជ្រាវ និងព្រមទាំងបង្កើនទំនាក់ទំនងកិច្ចសហការស្រាវជ្រាវវិទ្យាសាស្ត្ររវាងស្ថាប័នជាតិ មានដូចជារាជបណ្ឌិត្យសភាកម្ពុជា ក្រសួងវប្បធម៌និងវិចិត្រសិល្បៈ ជាមួយសាកលវិទ្យាល័យវ្លីនឌ័រ (UNIVERSITY OF FLINDERS) ប្រទេសអូស្រ្តាលី និង វិទ្យាស្ថានជាតិណារ៉ា ប្រទេសជប៉ុន (Nara National Research Institute for Cultural Properties) ផងដែរ។
ក្នុងការសិក្សាស្រាវជ្រាវក្នុងរយៈពេលប៉ុន្មានថ្ងៃនេះ មានគោលបំណង៖
- សិក្សាអំពីប្រវត្តិក្នុងតំបន់ដែលសិក្សា
- សិក្សាប្រវត្តិនៃឈ្មោះតំបន់
- ស្វែងរកទួលឡកុលាលភាជន៍
- ស្វែងរកទួលប្រាសាទ និង ទួលភូមិដ្ឋានមនុស្សរស់នៅ
- ត្រួសត្រាយព្រៃដែលដុះនៅលើទួល និង ជុំវិញទួលឡកុលាលភាជន៍
- គូរប្លង់បាតនៃទួលដោយប្រើម៉ាស៊ីន Total Station, Eye Level Machine និង GPS
- ថតរូបទួល និងស្ថានីយ ដោយប្រើឧបករណ៍ Drone និង បច្ចេកទេសបង្កើតរូបថតត្រីទស្សន៍ (3D Photo) ដោយប្រើកម្មវិធី Photogrammetry និង Photoscan។
ក្នុងឆ្នាំ២០២០នេះដែរ ក្រុមការងារស្រាវជ្រាវជាតិនិងអន្ដរជាតិនេះនឹងធ្វើកំណាយស្រាវជ្រាវស្វែងយល់អំពីការផលិតកុលាលភាជន៍ក្នុងតំបន់ស្រីសន្ធរ, រូបរាងរាងឡកុលាលភាជន៍, ប្រភេទផលិតផលកុលាលភាជន៍ដែលផលិតនៅតំបន់ស្រីសន្ធរ, អាយុកាលនៃសំណង់ឡកុលាលភាជន៍ ព្រមទាំងទំនាក់ទំនងនៃការធ្វើជំនួញជួញដូរពីតំបន់ស្រីសន្ធរទៅតំបន់ផ្សេងៗទៀតក្នុងប្រទេសកម្ពុជា។
