ដោយមានការណែនាំពីលោកបណ្ឌិត ផុន កសិកា ប្រធានស្តីទីវិទ្សាស្ថាន នៅព្រឹកថ្ងៃសុក្រ ៣កើត ខែពិសាខ ឆ្នាំជូត ឯកសក ព.ស.២៥៦៣ ត្រូវនឹងថ្ងៃទី២៤ ខែ មេសា ឆ្នាំ២០២០ វេលាម៉ោង៩៖០០ព្រឹក លោក ឈឿន សាវន ជាប្រធានគម្រោង និង លោក យិន ពោ ជាអនុប្រធានគម្រោងស្រាវជ្រាវគម្រោងស្ដីពី «បន្លែកម្ពុជា៖ ផលិតកម្ម ចរន្តទីផ្សារ បញ្ហាប្រឈម និងដំណោះស្រាយ» នៃវិទ្យាស្ថានមនុស្សសាស្ត្រ និងវិទ្យាសាស្ត្រសង្គម នៃរាជបណ្ឌិត្យសភាកម្ពុជា បានបន្តចុះប្រមូលទិន្នន័យបន្ថែមពីមន្ទីរកសិកម្ម ស្រុកខ្សាច់កណ្ដាល ខេត្តកណ្ដាល ទាក់ទងទៅនឹងស្ថានភាពភូមិសាស្ត្រ ក៏ដូចជាផ្ទៃដីសម្រាប់កសិកម្ម ផ្ទៃដីដាំបន្លៃរបស់ប្រជាកសិករក្នុងស្រុកខ្សាច់កណ្តាល ដើម្បីសិក្សាស៊ីជម្រៅបន្ថែមទៀត។
ស្រុកខ្សាច់កណ្តាល ស្ថិតនៅក្នុងខេត្តកណ្តាល មានវិសាលភាពធំទូលាយ ហើយដែលទីតាំងភូមិសាស្រ្តស្ថិតនៅតំបន់ទំនាបនៃទន្លេមេគង្គលើ មានព្រំប្រទល់រដ្ឋបាល ខាងលិចជាប់នឹងស្រុកមុខកំពូល ខាងកើតជាប់ស្រុកពារាំងនៃខេត្តព្រៃវែង ខាងជើងជាប់ស្រុកស្រីសន្ធរនៃខេត្តកំពង់ចាម និងខាងត្បូងជាប់ស្រុកល្វាឯម។ ស្រុកខ្សាច់កណ្ដាលមានសក្តានុពលលើការងារបង្កបង្កើនផលដំណាំស្រូវ ដំណាំអនុផលផ្សេងៗ នេសាទ និងជាមូលដា្ឋនអាជីវកម្ម ឧស្សាហកម្មផងដែរ។ តំបន់រដ្ឋបាលនៃស្រុកខ្សាច់កណ្តាល ចែកជាឃុំ១៨ និងភូមិ៩៨ មានផ្ទៃដី ៣៥,២៥៤ គ.ម២ មានប្រជាពលរដ្ឋសរុប១៣៦,៤៧៧ នាក់ ស្រីមានចំនួន ៧០,៤១២ នាក់ ស្មើនឹង ២៩,២៩៤ គ្រួសារ ក្នុងនោះអាយុ១៨ ឆ្នាំឡើង ៩២,១០៩ នាក់ ស្រី៤៨,៤៧១ នាក់។
ក្រុមការងារស្រាវជ្រាវបានជួបនិងធ្វើបទសម្ភាសន៍ជាមួយលោក សឿន សុខ មន្រ្តីនៃការិយាល័យធនធានធម្មជាតិ និងបរិស្ថាន ស្រុកខ្សាច់កណ្ដាល ខេត្តកណ្ដាល និងបានដឹងថា បច្ចុប្បន្នស្រុកមានផ្ទៃដីដាំដំណាំមជាង ៥០០ ហិកតា នៅរដូវប្រាំង តែរដូវវស្សាមានជាង១០០ ហិកតា ដោយទឹកទន្លេមេគង្គបានពន្លិចដីមួយភាគធំ។ ក្នុងអំឡុងពេលរដ្ឋាភិបាលបិទបន្លៃនាំចូលពីបរទេសរហូតដល់ពេលនេះ គឺបន្លែរបស់ប្រជាពលរដ្ឋ មានទីផ្សារល្អ និងមានតម្លៃល្អគួរសម ពិសេសដំណាំឪឡឹក។
ស្របពេលដែលគោលនយោបាយរបស់រដ្ឋាភិបាលក្នុងការរឹតបន្តឹងការនាំចូលបន្លែពីបរទេសបាន ធ្វើឱ្យប្រជាកសិករដាំបន្លែនៅទូទាំងប្រទេស ក៏ដូចជាប្រជាកសិករដាំបន្លែនៅស្រុកខ្សាច់កណ្ដាលមានសង្ឃឹម និងមានកម្លាំងចិត្តខិតខំដាំបន្លែបន្ថែមទៀតដើម្បី ផ្គត់ផ្គង់ជីវភាពប្រចាំថ្ងៃ។