ភ្នំពេញ៖ នៅព្រឹកថ្ងៃព្រហស្បតិ៍ ៦រោច ខែអស្សុជ ឆ្នាំជូត សំរិទ្ធិស័ក ព.ស២៥៦៤ ត្រូវនឹងថ្ងៃទី៨ ខែតុលា ឆ្នាំ២០២០ នៅបន្ទប់ប្រជុំវិទ្យាស្ថានមនុស្ស និងវិទ្យាសាស្រ្តសង្គម នៃរាជបណ្ឌិត្យសភាកម្ពុជា មានរៀបចំកិច្ចពិភាក្សាមួយ ក្រោមអធិបតីភាពឯកឧត្តមបណ្ឌិត ផុន កសិកា តំណាងក្រុមការងារសិក្សាស្រាវជ្រាវអំពី «អត្តសញ្ញាណបដិមាព្រះបាទជ័យវរ្ម័នទី៧» បានអនុញ្ញាតឱ្យលោក ជា សុជាតិ ប្រធានការិយាល័យអភិរក្ស នៃនាយកដ្ឋានសារៈមន្ទីរភ្នំពេញ និងជាអ្នកជំនាញបដិមាសាស្ត្រ ជួបពិភាក្សា ដើម្បីស្វែងរកការឯកភាព ក្នុងការកំណត់រូបព្រះបាទជ័យវរ្ម័នទី៧ ឱ្យបានជាក់លាក់ ពិសេសផ្តោតទៅលើការគ្រងមកុដកំពូលបី និងគ្រឿងរណ្តាប់របស់ព្រះមហាក្សត្រ។ សូមបញ្ជាក់ថា នៅក្នុងជំនួបនេះ ក្រុមការងារស្រាវជ្រាវ ដឹកនាំដោយឯកឧត្តមបណ្ឌិត ផុន កសិកា ប្រធានវិទ្យាស្ថាន និងមន្រី្តជំនាញពាក់ព័ន្ធ បានពិភាក្សាគ្នាយ៉ាងផុលផុសប្រកបដោយផលផ្លែ និងមេត្រីភាព។