កាលពីថ្ងៃសុក្រ ៩រោច ខែពិសាខ ឆ្នាំជូត ទោស័ក ព.ស.២៥៦៣៤ ត្រូវនឹងថ្ងៃទី១៥ ខែឧសភា ឆ្នាំ២០២០ លោកបណ្ឌិត ផុន កសិកា ប្រធានវិទ្យាស្ថានមនុស្សសាស្រ្ត និងសង្គមសាស្រ្ត និងសមាជិកពីររូបមាន លោក ឃិន យ៉ង់ និង លោក សួ ប៉ុណ្ណារ៉ាត់ ចុះសួរសុខទុក្ខប្រជាពលរដ្ឋនៅភូមិព្រៃដក់ពរ ឃុំត្រពាំង ធំខាងជើង ខេត្តតាកែវ។
ក្នុងឱកាសនេះ ក្រុមការងារបានជួបសំណេះសំណាលជាមួយ លោក មេឃុំ លោក មេភូមិ លោកអនុភូមិព្រៃដក់ពរ និងលោកស្រីជំនួយការភូមិ។ ក្នុងជំនួបសំណេះសំណាលនេះ លោកមេភូមិព្រៃដក់ពរ បានរាយការណ៍អំពីស្ថានភាពទូទៅរបស់ភូមិដក់ពរ ទាក់ទងវិស័យកសិកម្ម ដោយប្រជាជនភូមិព្រៃដក់ពរបានចាប់ផ្តើមសាបព្រោះស្រូវ និងដាំបន្លែបង្កាផ្សេងៗ សម្រាប់ផ្គត់ផ្គង់ក្នុងគ្រួសារ ដូចជា ដាំត្រកួន ដាំដំឡូង ដាំអំពៅជាដើម។ល។ ជាមួយគ្នានេះដែរ ក្រុមការងារបានចុះសួរសុខទុក្ខ និងសំណេះសំណាល ព្រមទាំងនាំអំណោយជាថវិកា និងគ្រឿងបរិភោគមួយចំនួនជូនគ្រួសារកំពុងមានជីវភាពខ្វះខាតជួបការលំបាកមានដូចខាងក្រោម៖
- ជូនលោក ម៉ាញ ធឿន ជាជនពិការជើងនូវថវិកាចំនួន៣០ ០០០ រៀល ទឹកដោះគោឆៅ១ឡូ មី៦កំប៉ុង និងត្រីខ ៣កំប៉ុង។
- ជូនលោកយាយ ប៉ុល ស៊ូយ ចាស់ជរាពិការភ្នែក ទីទាល់ក្រដែលមានជន្មាយុ៨០ឆ្នាំ នូវថវិកា ៣០ ០០០ រៀល ទឹកដោះគោឆៅ ១ឡូ មី ៦កំប៉ុង ត្រីខ ៣កំប៉ុង និងចៅប្រុសកំព្រានៅជាមួយលោកយាយថវិកាចំនួន១០០០០រៀល។
- ចូលបុណ្យ៧ថ្ងៃ លោកយាយ សាយ សេម នូវថវិកាចំនួន ៥០ ០០០រៀល។
- ជួយឧបត្ថម្ភថវិកាចំនួន៦០ ០០០រៀល ដល់លោក លោកស្រីជាប្រធាន អនុប្រធាន និងជំនួយការភូមិ សម្រាប់ប្រើប្រាស់ការងាររួមក្នុងភូមិផងដែរ។
