ភ្នំពេញ៖ នាថ្ងៃទី៣១ ខែមីនា ឆ្នាំ២០២១នេះ សម្ដេចតេជោ ហ៊ុន សែននាយករដ្ឋមន្រ្ដីនៃព្រះរាជាណាចក្រកម្ពុជា បានចេញអនុក្រឹត្យថ្មីមួយ ស្ដីពីវិធានការណ៍រដ្ឋបាលដើម្បីទប់ស្ដាក់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។
យោងតាមអនុក្រឹត្យខាងលើបានឱ្យដឹងថា ករណីចាំបាច់ដែលអនុញ្ញាតឱ្យចេញពីផ្ទះមានដូចជា ករណីសមាជិកគ្រួសារទទួលមរណភាព, ការទៅជួបនគរបាលឬតុលាការ តាមរយៈការកោះហៅ, ការទៅទិញរបស់បរិភោគ,ការចេញទៅបំពេញកិច្ចការងារ, ទៅប្រកបអាជីវកម្ម, ទៅមន្ទីពេទ្យឬឱសថស្ថាន,ចេញក្រៅដោយសារតែសមាជិកក្នុងគ្រួសារ កំពុងមានជំងឺធ្ងន់ធ្ងរនិងសង្គ្រោះបន្ទាន់, ការទៅធ្វើតេស្ដរកវីរុសកូវីដ១៩, និងទៅចាក់វ៉ាក់សាំងបង្ការជំងឺឆ្លងកូវីដ១៩។ បើយោងតាមមាត្រាទី៨ នៃអនុក្រឹត្យនេះ បានចែងថា រាល់ការធ្វើដំណើរចន្លោះពីម៉ោង ៨យប់ ដល់ម៉ោង ៥ ភ្លឺ អាចត្រូវបានហាមឃាត់ លើកលែងតែក្នុងករណីចាំបាច់មួយចំនួនប៉ុណ្ណោះ ដូចជា ការធ្វើដំណើរដោយសារមូលហេតុសុខភាពបន្ទាន់, មូលហេតុចាំបាច់និងបន្ទាន់ក្នុងគ្រួសារ, ការដឹកជញ្ជូនទំនិញ, ការបំពេញកាតព្វកិច្ចដែលបម្រើផលប្រយោជន៍សាធារណៈ, ការធ្វើដំណើរទៅបំពេញការងារ ឬកន្លែងអាជីវកម្ម ។ សូមមើលខ្លឹមទាំងស្រុកនៃអនុក្រឹត្យមានដូចខាងក្រោម៖
